• /
  • Nûçe
  • /
  • Zanîngeha Mardîn Artukluyê Ji Bo Hîndekariya Kurdî Bı “Mamoste I” Karekî Balkêş Pêk Anî

Zanîngeha Mardîn Artukluyê Ji Bo Hîndekariya Kurdî Bı “Mamoste I” Karekî Balkêş Pêk Anî

Pirtûka yekem a seta hîndekariya kurdî “Mamoste I”, ji aliye mamosteyên Enstituya Zimanên Zindî – Şaxa Makezanista Ziman û Çanda Kurdî û beşa Ziman û Edebiyata Kurdî ve hat derxistin. Ev xebat ji bo bernameyên lîsansê, kursên taybet û xebata takekesî hatiye plankirin.

Doç. Dr. Tahirhan Aydin diyar dike ku di vê xebatê de ji bo rêkxistin û hêsankirina hînkariyê, rêbaza unîte û dersan hatiye bikaranîn. Pirtûk ji du unîteyan û her unîte ji 14 dersan pêk tê, loma jî di pirtûkê de 28 ders hene.. Dîsa dibêje ku “Seta Hîndekariya Kurdî – Mamoste”, di warê hînkariya kurdî de ji ber pêwîstiyekê hatiye amadekirin. 

Aydin dibêje ku fêrkera Kurdî wek pirtûkeke hînkariya ziman, bi awayekî hevseng pêşvebirina her çar şiyanên ziman ji bo xwe dike armanc ku ew jî guhdarîkirin, axaftin, xwendin û nivîsîn in. Ji bo vê jî  di pirtûkê de rêbaza pevalînê (sarmal) hatiye bikaranîn ku ev jî, bi dubarekirina mijarên pêşî di nav mijarên paşî de hatiye pêkanîn û wisa berdewan dike:

“Ev pirtûk li ser rêbazên “ji hêsaniyê ber bi zoriyê”, “ji sadeyiyê ber bi aloziyê” hatiye amadekirin. Di metin, mijarên rêzimanê û hilbijartina peyv û qaliban de ev rêbaz li ber çavan hatine girtin.” 

Rektorê Zanîngeha Mardîn Artukluyê Prof. Dr. Ahmet Agirakca dibêje ku ew dixwazin bi terxankirina avahiyeke taybet a 2720 m2, beşa Ziman û Çanda Kurdî ya Enstituya Zimanên Zindî bikin navendeke bicazîbe ya zanistî û ew kefxweşiya xwe tînê ziman ku ev xebata “Seta Hîndekariya Kurdî – Mamoste” ku fermî di bin banê zanîngehê de hatiye amadekirin bi awayekî profesyonel hatiye amadekirin. 

Rektor Agirakca bal dikişîne li ser rê û rêbazên zanistî yên vê pirtûkê ku naveroka wê ji diyalogên nivîskî û bideng, rahênan û babetên rêzimanî pêk tê û di tevahiya naveroka wê de  xwendekar herdem di navdendê de ye û çalak e. Agirkakca wisa berdewam dike:

“Bêguman rêbaz û teknîkên ciyawaz ên hînkariya ziman hene. Rêbaz û teknîka herî rast ew rêbaz û teknîk e ku mijarê bide têgihandin. Ez mamosteyên me yên hêja re spasiyên xwe pêşkêş dikim ku wan ev berhema qedirgiran amade kirine û hînkirin û hînbûna vî zimanî hêsantir kiriye.”

Prof. Dr. Ahmet Agirakca ji bilî hîndekariya Kurdî li ser hîndekariya zimanê Suryanî jî disekine: 

“Digel Kurdî, em ê perwerdeya ji dûr ve (uzaktan)  ya bisertîfîka ji bo zimanên Suryanî û Erebî jî çalak bikin û bi vê jî em dixwazin hemû rengên çanda me biparêzin û pêş bixin. Ev jî îspata wê yekê ye ku em dê bi berdewamî li ser pêşxistina wan çavkaniyên çanda me bisekinin ku ew hemû di jiyana me de jî cî digirin û nirxên me yên çandî pêş dixin.”

Seta hîndekariya kurdî “Mamoste I” a ji CDyek û pirtûkekê pêk tê û ji aliyê beşa Ziman û Çanda Kurdî û beşa Ziman û Edebiyata Kurdî yên Zanîngeha Mardîn Artuklu ve hatiye amadekirin li Zanîngeha Mardîn Artukluyê dikare bê peydakirin.
 

T.C. ZANİNGÊHA MARDİN ARTUKLU